అంతర్జాతీయ సమాజానికి అందిస్తున్న సేవలను గుర్తిస్తూ అమెరికాలోని సియాటిల్‌ నగరం అక్టోబరు 19వ తేదీని ‘శ్రీశ్రీ రవిశంకర్‌ దినోత్సవం’గా ప్రకటించింది. ప్రపంచవ్యాప్తంగా మానసిక ఒత్తిడి.. హింస లేని సమాజాన్ని నిర్మించడం, వివిధ మతాల మధ్య సామరస్యాన్ని పెంపొందించడం, సమాజంలో విలువలు పెంచేందుకు ఆయన చేసిన కృషికిగాను ఈ గౌరవాన్ని ప్రకటిస్తున్నట్లు పేర్కొంది. రవిశంకర్‌ ‘ఆర్ట్‌ ఆఫ్‌ లివింగ్‌’ సంస్థ వ్యవస్థాపకులు.
ఒలింపిక్‌ స్వర్ణపతక విజేత, స్టార్‌ జావెలిన్‌ త్రోయర్‌ నీరజ్‌ చోప్రాకు భారత సైన్యంలో లెఫ్టినెంట్‌ కర్నల్‌గా గౌరవ హోదాను కల్పించారు. రక్షణ మంత్రి రాజ్‌నాథ్‌ సింగ్‌ 2025, అక్టోబరు 22న చోప్రాకు ఈ హోదాను ప్రదానం చేశారు. చోప్రా 2016లో నాయబ్‌ సుబేదార్‌గా సైన్యంలో తన కెరీర్‌ను ఆరంభించాడు. 2016లో సుబేదార్‌గా, 2022లో సుబేదార్‌ మేజర్‌గా అతడికి పదోన్నతి లభించింది.
విక్రం సారాభాయ్‌తో కలిసి భారత అంతరిక్ష కార్యక్రమానికి పునాది వేసిన ప్రముఖ శాస్త్రవేత్త ఏక్‌నాథ్‌ వసంత్‌ చిట్నిస్‌(100) మహారాష్ట్రలోని పుణెలో 2025, అక్టోబరు 22న మరణించారు. కేరళలోని తుంబాలో భారత మొట్టమొదటి రాకెట్‌ ప్రయోగానికి స్థల ఎంపికలో చిట్నిస్‌ కీలక పాత్ర పోషించారు. 1962 ఫిబ్రవరిలో నాటి ప్రధాని నెహ్రూ, సారాభాయ్, చిట్నిస్‌ల మధ్య జరిగిన చర్చ భారత అంతరిక్ష కార్యక్రమానికి నాంది పలికింది. ఆ భేటీ జరిగిన కొన్ని రోజులకు ‘ఇండియన్‌ నేషనల్ కమిటీ ఫర్ స్పేస్‌ రీసెర్చ్‌’ను ఏర్పాటు చేశారు. 1925, జులై 25న కొల్హాపుర్‌లో జన్మించిన చిట్నిస్‌ ఉన్నత విద్యను పుణెలో పూర్తిచేశారు.
తెలుగు రాష్ట్రాల ప్రజలు అత్యధికంగా అప్పుల ఊబిలో కూరుకుపోయినట్లు కేంద్ర గణాంకాల శాఖ తాజాగా విడుదల చేసిన సర్వే నివేదిక వెల్లడించింది. 2020-21 లెక్కల ప్రకారం ఆంధ్రప్రదేశ్‌లో 43.7% మంది, తెలంగాణలో 37.2% మంది అప్పుల్లో చిక్కుకున్నట్లు పేర్కొంది. ఈ విషయంలో ఏపీ 1, తెలంగాణ 2వ స్థానాల్లో నిలిచాయి. ఏపీలో 15 ఏళ్లకు పైబడిన జనాభాలో 92.3% మంది బ్యాంకింగ్‌ వ్యవస్థకు అనుసంధానం(ఫైనాన్షియల్‌ ఇంక్లూజన్‌) అయ్యారు. ఈ విషయంలో కర్ణాటక(95.9%) తర్వాతి స్థానాన్ని ఏపీ ఆక్రమించింది. తెలంగాణలో 86.5% మందే ఫైనాన్షియల్‌ ఇంక్లూజన్‌ పరిధిలో ఉన్నారు. ఈ విషయంలో దేశంలోని పెద్దరాష్ట్రాల్లో 14వ స్థానంలో తెలంగాణ ఉంది.
హెన్లే అండ్‌ పార్టనర్స్, ఆల్ఫాజియో సంయుక్తంగా ‘2025 గ్లోబల్‌ ఇన్వెస్ట్‌మెంట్‌ రిస్క్‌ అండ్‌ రిజైౖలెన్స్‌ ఇండెక్స్‌’ను విడుదల చేశాయి. ఆర్థిక, భౌగోళిక-రాజకీయ, పర్యావరణ అనిశ్చితులను తట్టుకుని, పుంజుకునే సామర్థ్యం ఆధారంగా 226 దేశాలకు ర్యాంకులు ఇచ్చారు. పెట్టుబడిదార్లకు అత్యంత అనుకూల దేశాల్లో స్విట్జర్లాండ్‌ అగ్రస్థానంలో నిలిచింది. స్విట్జర్లాండ్‌ తర్వాతి స్థానాల్లో డెన్మార్క్‌(2), నార్వే(3), సింగపూర్‌(4), స్వీడన్‌(5), లగ్జెంబర్గ్‌(6), ఫిన్లాండ్‌(7), గ్రీన్‌లాండ్‌(8), నెదర్లాండ్స్‌(9), జర్మనీ(10) ఉన్నాయి. దక్షిణ సూడాన్, లెబనాన్, హైతీ, సూడాన్, పాకిస్థాన్.. ఇవన్నీ చివరి స్థానాల్లో నిలిచాయి.
ఐక్యరాజ్య సమితి 2025, అక్టోబరు 22న గ్లోబల్‌ ఫారెస్ట్‌ రిసోర్స్‌ అసెస్‌మెంట్‌-2025 నివేదికను విడుదల చేసింది. దీని ప్రకారం, ప్రపంచవ్యాప్తంగా ఉన్న అటవీ విస్తీర్ణంలో భారత్ తొమ్మిదో స్థానానికి చేరుకుంది. వార్షిక అటవీ విస్తీర్ణ వృద్ధిలో మూడో స్థానాన్ని నిలుపుకొంది. 2024లో మన దేశం పదో స్థానంలో ఉంది. వార్షిక వృద్ధిలో చైనా, రష్యాల తర్వాతి స్థానాన్ని భారత్ ఆక్రమించింది. ప్రపంచవ్యాప్తంగా మొత్తం 4.14 బిలియన్‌ హెక్టార్ల (32 శాతం) అటవీ ప్రాంతముందని నివేదికలో పేర్కొంది. దీనిలో సగానికి(54 శాతం) పైగా రష్యా, బ్రెజిల్, కెనడా, అమెరికా, చైనాల్లో కేంద్రీకృతమైంది. ఆస్ట్రేలియా, కాంగో, ఇండోనేసియాలను అనుసరిస్తూ మొదటి 10 అటవీ సంపన్న దేశాల్లో భారత్ కూడా నిలిచింది.
దశాబ్దాల నుంచి కార్మికుల హక్కులను కాలరాస్తున్న కఫాలా వ్యవస్థను సౌదీ అరేబియా ఇటీవల రద్దు చేసింది. ఈ నిర్ణయంతో భారతీయులతోపాటు దక్షిణాసియాలోని చాలా మంది కార్మికులకు స్వేచ్ఛ లభించనుంది. కఫాలా అంటే అరబిక్‌ భాషలో స్పాన్సర్‌షిప్‌ అని అర్థం. సౌదీ అరేబియాకు చెందిన ఓ వ్యక్తి తన వ్యాపార లేదా గృహ అవసరాల కోసం మరో దేశం నుంచి కార్మికుడిని రప్పించుకుంటే.. వలసదారుపై ఆ వ్యక్తికి (యజమానికి) ఏయే హక్కులు ఉంటాయో వివరించేదే కఫాలా. సౌదీ అరేబియాలో దాదాపు 1.34 కోట్ల మంది వలసకార్మికులు ఉన్నారు. మొత్తం జనాభాలో వీరిది దాదాపు 40 శాతం. కఫాలా సాధారణంగా తక్కువ వేతనం ఉన్న ఉద్యోగాలకే వర్తిస్తుంది. నిర్మాణ రంగ కార్మికులు, పనిమనుషులు, పారిశ్యుద్ధ కార్మికులు, డ్రైవర్లు, క్లీనర్లు ఈ జాబితాలో ఉన్నారు. వీరంతా సాధారణంగా భారత్, బంగ్లాదేశ్, పాకిస్థాన్, ఫిలిప్పీన్స్, నేపాల్, ఇథియోపియా నుంచి వలస వచ్చినవారే.
న్యూదిల్లీలోని సెంట్రల్ కౌన్సిల్ ఫర్ రిసెర్చ్‌ ఇన్ హోమియోపతి (సీసీఆర్‌హెచ్‌) రిసెర్చ్‌ అసోసియేట్‌, రిసెర్చ్‌ ఫెలో, జేఆర్‌ఎఫ్‌, ఫీల్డ్‌ అసిస్టెంట్‌ పోస్టుల భర్తీకి ఇంటర్వ్యూలు నిర్వహిస్తోంది. మొత్తం పోస్టుల సంఖ్య: 13 వివరాలు: 1. రిసెర్చ్‌ అసోసియేట్‌ (వెటేరినేరియన్‌): 01 2. సీనియర్ రిసెర్చ్‌ ఫెలో (హోమియో): 05 3. రిసెర్చ్‌ అసోసియేట్‌ (కెమిస్ట్రీ): 01 4. ప్రాజెక్ట్‌ అసోసియేట్‌ (కెమిస్ట్రీ): 01 5. సీనియర్ రిసెర్చ్‌ ఫెలో (డైటీషియన్‌): 01 6. సీనియర్/జూనియర్ రిసెర్చ్‌ ఫెలో (హోమియో): 03 7. జేఆర్‌ఎఫ్‌ (బొటనీ): 01 8. ఎస్‌ఆర్‌ఎఫ్‌ (బొటనీ): 01 9. ఫీల్డ్‌ అసిస్టెంట్‌: 01 అర్హత: పోస్టును అనుసరించి సంబందిత విభాగాల్లో బీఎస్సీ, ఎంఎస్సీ, పీజీ, పీహెచ్‌డీ, ఎంఫాం ఉత్తీర్ణతతో పాటు నెట్‌/గేట్‌/ఆర్‌ఈటీ స్కోర్‌, కంప్యూటర్‌ పరిజ్ఞానంతో పాటు ఉద్యోగానుభవం ఉండాలి. వయోపరిమితి: రిసెర్చ్‌ అసోసియేట్‌ పోస్టులకు 40 ఏళ్లు, ఇతర పోస్టులకు 35 ఏళ్లు మించకూడదు. జీతం: నెలకు రిసెర్చ్‌ అసోసియేట్‌కు రూ.58,000; సీనియర్ రిసెర్చ్‌ ఫెలోకు రూ.42,000, జేఆర్‌ఎఫ్‌కు రూ.37,000; ప్రాజెక్ట్‌ అసోసియేట్‌కు, ఫీల్డ్‌ అసిస్టెంట్‌కు రూ.25,000. పని ప్రదేశాలు: నోయిడా, హైదరాబాద్‌, న్యూదిల్లీ, సిలిగురి, ఊటీ. ఎంపిక విధానం: ఇంటర్వ్యూ ఆధారంగా. ఇంటర్వ్యూ తేదీలు: 06, 07, 08, 10, 11, 14.11.2025. Website: https://www.ccrhindia.nic.in/
సర్దార్‌ వల్లభ్‌భాయ్‌ పటేల్‌ నేషనల్ ఇన్‌స్టిట్యూట్‌ ఆఫ్‌ టెక్నాలజీ (ఎస్‌వీఎన్‌ఐటీ), సూరత్‌ డైరెక్ట్‌ రిక్రూట్‌మెంట్‌ ప్రాతిపదికన జూనియర్ అసిస్టెంట్‌, సీనియర్ అసిస్టెంట్‌ ఉద్యోగాల భర్తీకి దరఖాస్తులు కోరుతోంది. మొత్తం పోస్టుల సంఖ్య: 10 వివరాలు: 1. జూనియర్ అసిస్టెంట్‌: 09 2. సీనియర్ అసిస్టెంట్‌: 01 అర్హత: పోస్టులను అనుసరించి ఇంటర్మీడియట్‌ ఉత్తీర్ణతతో పాటు టైపింగ్‌ వచ్చి ఉండాలి. గరిష్ఠ వయోపరిమితి: జూనియర్ అసిస్టెంట్‌కు 27 ఏళ్లు, సీనియర్ అసిస్టెంట్‌కు 33 ఏళ్లు. ఎంపిక ప్రక్రియ: రాత పరీక్ష ఆధారంగా. దరఖాస్తు ప్రక్రియ: ఆన్లైన్ ఆధారంగా. దరఖాస్తు ఫీజు: రూ.500. ఎస్సీ, ఎస్టీ, పీడబ్ల్యూబీడీ అభ్యర్థులకు ఫీజు లేదు. ఆన్లైన్ దరఖాస్తు స్వీకరణకు చివరి తేదీ: 2025 నవంబర్ 14. Website:https://www.svnit.ac.in/web/jobs.php
సర్దార్‌ వల్లభ్‌భాయ్‌ పటేల్‌ నేషనల్ ఇన్‌స్టిట్యూట్‌ ఆఫ్‌ టెక్నాలజీ (ఎస్‌వీఎన్‌ఐటీ), సూరత్‌ డైరెక్ట్‌ రిక్రూట్‌మెంట్‌ ప్రాతిపదికన వివిధ విభాగాల్లో కింది ఉద్యోగాల భర్తీకి దరఖాస్తులు కోరుతోంది. మొత్తం పోస్టుల సంఖ్య: 08 వివరాలు: 1. సూపరింటెండెంట్‌: 04 2. జూనియర్ ఇంజినీర్‌(సివిల్‌): 02 3. టెక్నికల్ అసిస్టెంట్‌(కంప్యూటర్‌ సైన్స్‌): 02 అర్హత: పోస్టులను అనుసరించి సంబంధిత విభాగంలో బీఈ/బీటెక్‌, ఎంసీఏలో ఉత్తీర్ణతతో పాటు పని అనుభవం ఉండాలి. గరిష్ఠ వయోపరిమితి: 30 ఏళ్లు. దరఖాస్తు ప్రక్రియ: ఆన్లైన్ ఆధారంగా. ఎంపిక ప్రక్రియ: రాత పరీక్ష ఆధారంగా. దరఖాస్తు ఫీజు: రూ.500. ఎస్సీ, ఎస్టీ, పీడబ్ల్యూబీడీ అభ్యర్థులకు ఫీజు లేదు. ఆన్లైన్ దరఖాస్తు స్వీకరణకు చివరి తేదీ: 2025 నవంబర్ 14. Website:https://www.svnit.ac.in/web/jobs.php
Your account has been blocked from accessing the discussion forum.If you believe this is a mistake or wish to inquire further,please contact the support team.