మోదీతో మార్క్ కార్నీ భేటీ
భారత పర్యటనలో ఉన్న కెనడా ప్రధాని మార్క్ కార్నీ 2026, మార్చి 2న ప్రధాని నరేంద్ర మోదీతో సమావేశమయ్యారు. ఇద్దరు నేతల ద్వైపాక్షిక, అంతర్జాతీయ అంశాలపై చర్చలు జరిపారు. ఈ సందర్భంగా యురేనియం, కీలక ఖనిజాల సరఫరా సహా పలు కీలక ఒప్పందాలపై భారత్-కెనడా దేశాలు సంతకాలు చేశాయి. రక్షణ, అణు రియాక్టర్లు, విద్య, పునరుత్పాదక ఇంధనం.. తదితర రంగాల్లో సహకారాన్ని మరింత పెంపొందించుకోవాలని నిర్ణయించారు. 2030 కల్లా వార్షిక ద్వైపాక్షిక వాణిజ్యం 50 బిలియన్ డాలర్లకు చేర్చాలన్నదే లక్ష్యమని.. ఇందుకోసం త్వరలోనే సమగ్ర ఆర్థిక భాగస్వామ్య ఒప్పందం కుదుర్చుకుంటామని మోదీ తెలిపారు.