కృత్రిమ మేధ (ఏఐ) సాయంతో రోగులను పరీక్షించే  క్లినిక్‌ ప్రపంచంలోనే తొలిసారిగా సౌదీ అరేబియాలో ప్రారంభమైంది.

చైనాకు చెందిన వైద్య పరిజ్ఞాన సంస్థ సైన్యీ ఏఐతో భాగస్వామ్యం ద్వారా అల్‌మూసా హెల్త్‌ గ్రూప్‌ ప్రయోగాత్మకంగా దీన్ని అందుబాటులోకి తెచ్చింది.

సౌదీలోని అల్‌ అహ్సా ప్రావిన్స్‌లో ఇది ఏర్పాటైంది.

రోగులతో తొలుత సంభాషించి, వ్యాధి నిర్ధారణ, చికిత్స చేసే బాధ్యత నుంచి వైద్యులను తప్పించడం దీని ఉద్దేశం. 

ఏఐ వైద్య వ్యవస్థకు ‘డాక్టర్‌ హువా’ అని పేరుపెట్టారు.

క్లినిక్‌కు వచ్చాక.. ఒక ట్యాబ్‌ సాయంతో ఏఐకి తమ వ్యాధి లక్షణాలను రోగి వివరించాలి.

వెంటనే అది మరిన్ని ప్రశ్నలు సంధిస్తుంది.

మానవ సహాయకుల సాయంతో సేకరించిన డేటాను, చిత్రాలను విశ్లేషిస్తుంది. ఈ ప్రక్రియ పూర్తికాగానే డాక్టర్‌ హువా ఒక చికిత్స ప్రణాళికను అందిస్తుంది.

దీన్ని వైద్యుడు కూలంకషంగా సమీక్షించి, సంతకం చేస్తారు.

అయితే ఏఐ పరిశీలించలేని అత్యవసర కేసుల కోసం వైద్యులు అందుబాటులో ఉంటారు.