నేషనల్‌ క్యాడెట్‌ కార్ప్స్‌ (ఎన్‌సీసీ) అనేది పౌరరక్షణ సేవాదళం. యువతలో పాఠశాల స్థాయి నుంచే క్రమశిక్షణ, సేవాభావం, దేశభక్తి, నాయకత్వ లక్షణాలు పెంపొందించడంలో ఇది ముఖ్య భూమిక పోషిస్తోంది. అంతేకాక ప్రజలకు సహాయ సహకారాలు అందించడంలో సైనిక దళాలతో సమానంగా ఎన్‌సీసీ వాలంటీర్లు పనిచేసేలా శిక్షణ ఇస్తారు. ఎన్‌సీసీ ఏర్పాటుకు గుర్తుగా మన దేశంలో ఏటా నవంబరు నాలుగో ఆదివారం రోజు నేషనల్‌ క్యాడెట్‌ కార్ప్స్‌ (ఎన్‌సీసీ) దినోత్సవంగా నిర్వహిస్తారు. 2025్చ్వ అది నవంబరు 23న వచ్చింది. యువతను బాధ్యతాయుతమైన పౌరులుగా, నాయకులుగా తీర్చిదిద్దడంలో ఎన్‌సీసీ పాత్రను గుర్తు చేసుకోవడం ఈ రోజు ముఖ్య ఉద్దేశం.

చారిత్రక నేపథ్యం

సైనిక సిబ్బంది కొరత తీర్చేందుకు బ్రిటిష్‌ ప్రభుత్వం 1917లో ఇండియన్‌ డిఫెన్స్‌ యాక్ట్‌ కింద ‘యూనివర్సిటీ కార్ప్స్‌’ను ప్రవేశపెట్టింది. ఎన్‌సీసీకి పూర్వ రూపంగా దీన్ని చెబుతారు. 

భారతదేశ మొదటి ప్రధాని జవహర్‌లాల్‌ నెహ్రూ 1948, నవంబరు చివరి ఆదివారం నాడు దిల్లీలో మొదటి ఎన్‌సీసీ యూనిట్‌ ఏర్పాటు కార్యక్రమానికి అధ్యక్షత వహించారు. దీనికి గుర్తుగా ఏటా ఆ రోజున ‘నేషనల్‌ క్యాడెట్‌ కార్ప్స్‌ (ఎన్‌సీసీ) దినోత్సవం’గా నిర్వహిస్తున్నారు.