గల్ఫ్‌ దేశాల్లోని ప్రవాసులు భారత్‌లో నివసిస్తున్న తమ వారికి పంపిన డబ్బులతో (రెమిటెన్సెస్‌) పోలిస్తే.. అమెరికా, బ్రిటన్‌ వంటి అభివృద్ధి చెందిన దేశాల్లోని ప్రవాస భారతీయులు తమ ఆత్మీయులకు పంపిన డబ్బే గత ఆర్థిక సంవత్సరంలో (2023-24) అధికంగా ఉంది. ఈ విషయాన్ని 2025, మార్చి 19న విడుదలైన రిజర్వ్‌ బ్యాంక్‌ ఆఫ్‌ ఇండియా (ఆర్‌బీఐ) బులెటిన్‌ పేర్కొంది. అందులోని విశేషాలు:

విదేశాల్లోని భారతీయులు 2010-11లో 55.6 బిలియన్‌ డాలర్ల మేర నిధులను మనదేశానికి పంపారు. 2023-24 కల్లా ఇది రెట్టింపునకు పైగా పెరిగి 118.7 బిలియన్‌ డాలర్ల (దాదాపు రూ.10.32 లక్షల కోట్ల)కు చేరింది. విదేశీ అనిశ్చితులను తట్టుకోవడానికి ఈ నిధులు కీలకంగా మారాయి. వస్తువుల ఎగుమతి, దిగుమతి వాణిజ్య లోటులో సగాన్ని ఇవి తీర్చాయి.