సతత హరితారణ్యాలు ఎక్కువగా విస్తరించిన భూభాగాన్ని వర్షారణ్యాలు అంటారు. ఇవి అత్యంత పురాతన జీవావరణ వ్యవస్థలను కలిగి, ప్రపంచంలోని సగానికిపైగా వృక్ష, జంతు జాతులకు నిలయాలుగా ఉన్నాయి. వర్షారణ్యాల వల్ల భూగోళానికి, జీవవైవిధ్యానికి కలిగే ప్రయోజనాలను తెలిపే లక్ష్యంతో ఏటా జూన్‌ 22న ‘ప్రపంచ వర్షారణ్య దినోత్సవం’గా (World Rainforest Day) నిర్వహిస్తారు. వర్షారణ్యాల ప్రాధాన్యం, ఉపయోగాలు, నిర్మూలించడం వల్ల కలిగే నష్టాల గురించి ప్రజలను చైతన్యపరచడం ఈ రోజు ముఖ్య ఉద్దేశం.

చారిత్రక నేపథ్యం 

• వర్షారణ్యాల అభివృద్ధి, రక్షణే ధ్యేయంగా నియాంట స్పెల్మన్‌ 2007లో టెక్సాస్‌లోని ఆస్టిన్‌లో ‘రెయిన్‌ఫారెస్ట్‌ పార్టనర్‌షిప్‌’ అనే స్వచ్ఛంద సంస్థను ఏర్పాటు చేశారు. పర్యావరణ పరిరక్షణలో వర్షారణ్యాల పాత్ర గురించి ఐక్యరాజ్య సమితితో కలిసి ఈ సంస్థ అనేక అవగాహన కార్యక్రమాలు నిర్వహిస్తుంది. కలప, పరిశ్రమల స్థాపన, వ్యవసాయం, నివాస అవసరాల కోసం వర్షారణ్యాలను నిర్మూలించడాన్ని అరికట్టి, వాటిని రక్షించాల్సిన అవసరంపై ప్రజలకు అవగాహన కల్పించే లక్ష్యంతో ఏటా జూన్‌ 22న ‘ప్రపంచ వర్షారణ్య దినోత్సవం’గా జరుపుకోవాలని 2017లో ‘రెయిన్‌ఫారెస్ట్‌ పార్టనర్‌షిప్‌’ ప్రపంచ దేశాలకు సూచించింది.
• 2026 నినాదం: The Forest Within You